MM ஸ்டூடியோஸ் நிறுவனம் சார்பில் எம் மூர்த்தி தயாரிப்பில், வெற்றி, ப்ரியாலயா, லிவிங்ஸ்டன், அபிராமி வெங்கடேசன், ஏ. வெங்கடேஷ், ராமர், அருள் டி சங்கர் உள்ளிட்டோர் நடிப்பில் வெளிவந்துள்ள படம் “பிளாக் கோல்டு”.
கதைப்படி.. தலைமுடி ஏற்றுமதி நிறுவனத்தில் லாரி டிரைவராக லிவிங்ஸ்டன் இருக்கிறார். அவரது மகன் வெற்றி, மனைவி மகளுடன் சந்தோஷமாக காலம் நகர்கிறது. வெற்றி ப்ரியாலயாவை காதலிக்கிறார். ப்ரியாலயா வீட்டில் இவர்கள் காதலை ஏற்க மறுக்கிறார்கள். இதற்கிடையில் திருப்பதியில் பக்தர்கள் காணிக்கையாக செலுத்தும் முடிகளை ஏலம் எடுத்து, வெளிநாடுகளுக்கு ஏற்றுமதி செய்யும் ஏ. வெங்கடேஷ், அருள் டி சங்கர் கோஷ்டிகள் இடையே தொழில் போட்டி வலுக்கிறது.

மேலும் நான்குபேர் கொண்ட கும்பல், வீடுகளில் தனியாக வசிக்கும் முதியவர்களை கொடூமாக கொலை செய்து, அவர்களிடம் உள்ள நகைகளை கொள்ளையடித்துச் செல்கின்றனர். இந்நிலையில் அவசரமாக லோடு ஏற்றிச்சென்ற லாரி காணாமல் போகிறது, லாரி டிரைவர் லிவிங்ஸ்டனும் காணாமல் போகிறார். தந்தையை தேடி அழைக்கிறார் வெற்றி. லாரியில் உள்ள சரக்கு பலகோடி மதிப்புள்ளது என ஏ. வெங்கடேஷூம் புகார் கொடுக்கிறார்.
காணாமல் போன லாரி என்னானது? லிவிங்ஸ்டன் கிடைத்தாரா ? காதலியை கரம் பிடித்தாரா வெற்றி ? என்பது மீதிக்கதை..
சந்தோஷமாக வாழும் நடுத்தர குடும்பத்தில், எதிர்பாராத வகையில் நடந்தேறும் சில சம்பவங்களால் ஏற்படும் மாற்றங்களை, க்ரைம், த்ரில்லர் திரைக்கதையில் சுவாரஸ்யம் குறையாமல் கதையை நகர்த்தியிருக்கிறார் இயக்குனர்.

நாயகன் வெற்றி, குடும்பபாசம் தந்தை, மகன் சென்டிமென்ட், சண்டை காட்சிகளில் சிறப்பாக நடித்திருக்கிறார். காதல் காட்சிகளில் நடிப்பில் இன்னும் கவனம் செலுத்தியிருக்கலாம்.
லிவிங்ஸ்டன் தனது அனுபவமான நடிப்பின் மூலம் கவனம் ஈர்க்கிறார். ஆனால் அவரது தோற்றம் முதுமையை பிரதிபலிக்கிறது. ஒப்பணையில் கவனம் செலுத்தியிருக்கலாம்.
அருள் டி சங்கர் நடிப்பிலும் சண்டை காட்சிகளிலும் கவனம் ஈர்க்கிறார். அதேபோல் ஏ. வெங்கடேஷ் நடிப்பு சொல்லிக்கொள்ளும் வகையில் பெரிதாக எடுபடவில்லை என்றே சொல்லலாம். பின்னனி இசையும், ஒளிப்பதிவும் படத்திற்கு பலம் சேர்த்துள்ளது.




































































































